Пул кўпаймоқда Кенг маънодаги пул массаси (М2) қарийб 2,2 трлн.сўмга ортиб, қарийб 107,6 трлн.сўмга етган ва йил бошидаги кўрсаткич билан тенглашган. Иқтисодий ва молиявий мавсумийликка кўра пул массасининг ўсиши айнан май ойидан бошланади ва одатда сентябргача давом этади. Бу йил ҳам истисно эмасдек. Пул массаси таркибидаги нақд пуллар ҳажми ҳам ўтган ойга нисбатан 1 трлн.сўмга кўпайган ва 23,5 трлн.сўмга етган, лекин барибир йил бошидаги кўрсаткичдан 1,4 трлн.сўмга кам. Пул ва ликвидлик кўпайганининг яна бир белгиси вакиллик ҳисобварақларидаги (корсчет) қолдиқлардир. Вакиллик қолдиқлари бир ой ичида 4 трлн.сўмга ошиб, 17,5 трлн.сўмга етган. Табиийки, мажбурий захиралар қолдиқлари ҳам кўпайиб бормоқда. 1 май ҳолатига ушбу кўрсаткич деярли 1,8 трлн.сўмни ташкил этган.