Навбатдаги облигациялар чиқарилуви бўйича якуний ставкалар қандай бўлади? Ўзбекистон евробондлари даромадлилиги якуний мўлжали долларда 3.9-4%ни, сўмда эса 14-14.25%ни ташкил этиши айтилмоқда. Китоб ёпилгунча ставкалар янада тушиши мумкин. Ўзбекистоннинг илк облигациялари 2019 йил февралда жойлаштирилган. эди. Ўшанда буюртмаларни қабул қилишда 10 йиллик доллардаги облигациялар учун ориентир 6% атрофида бўлган ҳолда, якунда 5,375% ставка билан китоб ёпилганди. Ўтган йили ноябрда эса 10 йиллик доллардаги облигациялар учун мўлжал 4,25%дан бошланган, якунда пировард ставка 3,70%ни ташкил этган. Сўмдаги облигациялар учун эса буюртмалар 15,25%дан очилиб, якуний ставка 14,5%ни ташкил этган. Доллардаги облигациялар учун талаб деярли 4 баробар юқори экани инобатга олинса, якуний ставкалар ўтган галги жойлаштирув ставкасидан (3,7%) ҳам пастроқ бўлиши мумкин. Сўмдаги ставка 14%дан пастроқ бўлиши мушкулроқ, буюртмалар ҳам кўп эмас. Умуман олганда, жойлаштирув учун қулай вақт танланган, глобал бозорда пул таклифи кўп, спекуляциялардан ҳоли мувозанатли вазият, қолаверса мамлакат рейтинги прогнозлари яхшиланган бир позитив консенсус ҳукмрон.