Эмланишга иккиланиш ҳақида. Ўзбекистонда аҳолининг катта қисми ковидга қарши эмланишга иккиланаётганига гувоҳ бўлиб турибмиз. Ва бу иккиланиш янгидан-янги ўлимларга олиб келаётгани ҳам табиий. Хўш, аҳоли нега иккиланяпти? Нега одамлар эмлангиси келмаяпти? Ким айбдор? Ўзбекистонда эмлаш сустлиги, одамлар эмлангиси келмаётганига асосий сабабчи, асосий айбдор ҳукумат деб ҳисоблайман. Чунки ҳукумат тўғри ахборот сиёсатини олиб боргани йўқ. Мисол: АҚШ. АҚШнинг собиқ президенти, аҳмоқ Трамп ковид пайдо бўлганидан буён бу Демократлар томонидан ўйлаб топилгани, бўлмаган касал экани, уни жиддий қабул қилмасликни таъкидлаб келди. Ўтган йили кузда ўзи касал бўлиб, дунёдаги энг зўр докторлар ёрдами билан тузалиб чиқиб, "бу оддий касал экан, ваҳима қилманглар" деди. АҚШнинг ҳозирги президенти Байден эса сайловдан аввал ҳам, президент бўлгач ҳам ковид жиддий касал экани, ҳамма маска тақиши кераклиги, имконият бўлиши билан эмланиш кераклиги ҳақида ҳар куни таъкидлади. Натижа: АҚШда аҳолиси энг кам эмланган 10та штатнинг 9таси 2020 йилда Трампга овоз берган. Энг кўп эмланган 10та штатнинг 9таси эса, аксинча, Байденга овоз берган. Кўряпсизми боғлиқликни? Ўзбекистонда ҳам вакцина олиш кераклиги ҳақида ўтган йилдан бошлаб, ҳали вакцинани қўлга киритишдан аввал ҳам тўхтамай, тинмай маълумот бериб туриши керак эди. Бундан ташқари, маълумот бир хил, тизимли (последовательно) берилиши керак. Берилган маълумот, қайси амалдордан чиқмасин, бир хил бўлиши шарт. Икки амалдордан иккита гап чиқса, одамда шубҳа уйғониши табиий. Яна бир нарса: эшитишимча, поликлиникаларда докторларнинг ўзлари одамларни эмланмасликка тарғиб қилишаётганмиш. Бундай ҳолатларни олдини олиш керак, албатта. Бунинг учун вакцина ҳақида маълумот оладиган марказлашган манба бўлиши керак. Шунда докторлар ТикТокдаги видеоларни кўрволиб, билар-билмас маслаҳат беравермайди. Масалан, ковид бўлиб тузалгандан кейин қанча кутиш керак вакцина олиш учун? Ҳомиладор аёллар қачон олиши керак? Диабет, рак, гепатит касали борлар нима қилиши керак? Мана шу маълумотларнинг барчасига жавоб битта манбада бўлиши шарт. Шунда баъзи докторларнинг субъектив фикрлари аҳолининг эмланишига таъсир қилмайди. Танишлардан вакцина олгандан кейин уч кун чўмилмаслик, ёки Зодак ичиш кераклиги ҳақида кулгули хабарлар оляпман. Мана шунақа ғалати ишларни олдини олиш учун ҳам саволларга жавоб битта манбадан олиниши керак. Эмланинг. Ўзингизни ва яқинларингизни эҳтиёт қилинг. @zambarakning_oqi