“Коррупционерлар ўтган йили 500 миллиард, жорий йилнинг беш ойида 450 млрд сўм зарар етказган” - Шавкат Мирзиёев Президент Шавкат Мирзиёев “Янги Ўзбекистон” газетасига берган интервьюсида мамлакат коррупцияга қарши изчил кураш олиб борилаётгани ҳақида айрим фактлар билан ўртоқлашди. Давлат раҳбарининг маълум қилишича, 2020 йилда турли даражадаги мансабдорлар томонидан содир этилган жиноятлар учун 1723 шахс жиноий жавобгарликка тортилган. Улар томонидан етказилган зарар 500 миллиард сўмни ташкил этган. 2021 йилнинг беш ойида эса 1696 нафар мансабдорга нисбатан жиноий иш очилган. Етказилган зарар 450 миллиард сўмни ташкил этмоқда. “Ҳеч шубҳасиз, бу моддий зарарлар айбдорлардан ундириб олинади. Коррупция балосини жамиятимиз ҳаётидан йўқ қилишга қаратилган сиёсат келгусида ҳам қатъий давом эттирилади”, деди Шавкат Мирзиёев.