Янги медиана 26 августдан бошлаб 7 сентябргача ҳисоблаганда АҚШ долларининг сўмга нисбатан қиймати 54,49 сўмга ошган ва 10695,23 сўмга етган. Лекин инобатга олиш лозимки, узоқ давом этган байрам ҳисобига ўтган 12 кун давомида 5тагина савдо сессияси амалга ошган холос. Яъни импортерларнинг йиғилиб қолган талаби ҳам ўз таъсирини кўрсатган. Маълумот учун бундан аввалги сергаклантирган кичик тўлқин 5 июлдан 14 июлгача бўлган даврда юз берган ва шу даврда биржа савдоларида АҚШ доллари ўртача курси 66,4 сўмга ошган эди. Ўшандан буён чакана сотиш курслари медианаси 10600-10700 сўм оралиғида қолаётган эди. Сентябрь кичик тўлқинидан кейин биз балки 10700-10800 сўм оралиғидаги медианага кўникиб боришимиз мумкин. Ундан ортиқ эмас.