Курс ўзгаришлари соф фундаментал омиллар туфайли Кейинги 10 кунда АҚШ долларининг сўмга нисбатан ўртача тортилган қиймати биржа савдоларида 10593,60 сўмдан 10660 сўмгача кўтарилди. Тижорат банкларининг шохобчаларида эса АҚШ долларининг чакана сотиш курси 10640 сўмдан 10710 сўмгача ошиб борди. Албатта бу ҳолат ўта сезгирлашиб бораётган тужжорларимиз ва аҳоли қатламларини бироз хаяжонлантирган бўлиши мумкин. Айтиш жоизки, маълум бир даврда валюта курсининг талабга мувофиқ бироз юқори суръатларда ўсиб боришига оддийроқ қараш керак. Айниқса ташқи факторлар мавжуд бўлмаганида. Масалан, 5 июлдан 14 июлгача бўлган даврда биржа савдоларида АҚШ доллари ўртача курси 66,4 сўмга ошган кунларда савдолар ҳажми 674 млн. АҚШ долларини ташкил этган, бу аввалги 8 та сессиядаги ҳажмдан қарийб 1,6 баробар юқори дегани. Бошқача айтганда, охирги кунларда курс шаклланишида соф фундаментал талаб асосий ўринга эга бўлган. Худди шундай ҳолатни 7-15 июнь саналари оралиғида савдо ҳажми ошганида ҳам кузатиш мумкин эди. Ўшанда 7та сессиянинг ўзида АҚШ доллари курси 83,9 сўмга - 10532,12 сўмдан 10 616,02 сўмгача юқорилаганди. Ушбу сатрлар ёзилаётганда бугунги савдолардаги АҚШ долларининг ўртача курси 9,34 сўмга пасайиб, 10 650,66 сўмни ташкил этган эълон қилинди. Демак, эртага чакана курсларда ҳам пасайиш бошланишини кутиш мумкин. @the_bakiroo