Россия албатта озод бўлади, лекин эртага эмас! Эртага Россия давлат Думасига сайловлар бошланади. Биринчи марта сайловлар уч кун давом этади. Шунингдек мазкур циклда депутатларнинг ярми партиявий рўйхат, қолган ярми эса мажоритар тартибда сайланади. Борган сари Туркманистон, 2016 йилгача бўлган Ўзбекистон ва Шимолий Корея каби давлатлар йўриғини эслатаётган Путин Россиясида Кремлга лоял ва чўнтак партияларнинг салгина ўзгача фикрловчи ва мустақил вакиллари ҳам сайловга қўйилмаган. Яъни бюллетенга киритилган шахслар ҳам тўла-тўкис Кремль назорати остида фильтрдан ўтказилган. Озод ва демократик Россиянинг ягона умиди Навальний ва унинг тарафдорлари ё қамоқда ё хорижда. Шундай бўлсада, Навальнийчилар ўтган галдаги каби "Ақлли овоз бериш" механизмидан фойдаланишни таклиф этишмоқда. Бунда принцип оддий: Номзодларнинг барчаси ёмон. Лекин улар орасида камроқ ёмонини танлаш керак. Феълан бўлажак Думанинг депутатлари аллақачон танлаб, тайинланиб бўлинган. Лекин шундай бўлсада Путин етовидаги ўғри ва муттаҳамларнинг "сайлов" аталмиш махсус операциясини осонгина ўтказиб олишига етарлича муаммолар яратиш мумкин. Ҳеч бўлмаганда танланган ва тайинланган парламентга нисбатан нолегитимлик характерини ёпиштириш учун. Нима бўлгандаям, Россия албатта озод бўлади. Тўғри, эртага эмас.