“Ўзтўқимачиликсаноат” уюшмаси ип калава экспортига вақтинчалик қўшимча тўлов киритмоқчи. Спойлер: бу ёмон оқибатлар яратади Маълумки, шу кунларда занжир узилишлари кўплаб хом-ашёларнинг етишмовчилиги ва нарх ошиш тўлқинларини яратмоқда. Қачонлардир 1- рақамли экспорт товаримиз бўлган пахтанинг тоннаси масалан, ҳозир 2400 долларга чиққан. Тўғри, ҳозир пахта экспорт қилмаймиз. Лекин унинг ўрнини калава ип эгаллаган. “Ўзтўқимачиликсаноат” уюшмаси ички бозорда ип-калава учун «асоссиз ажиотаж» кузатилаётгани боис 2021 йил ноябрь ойида ип калава экспортига вақтинчалик қўшимча тўлов амалиёти жорий этилиши мумкинлиги ҳақида маълум қилмоқда. Бу тўлов қай кўринишда бўлади, номаълум. Бусиз ҳам йил бошида Ҳукумат қарори билан экспортга умумий ишлаб чиқариладиган пахта ип-калавасининг ўртача 50 фоизи миқдорида белгиланган ва квотадан ортиқ экспорт қилинадиган пахта ип-калавасининг (бўялган калава бундан мустасно) ҳар бир килограмми учун 0,32 АҚШ доллари миқдорида қўшимча йиғим ундириш белгиланган эди. 1 августдан бу талаблар катта эҳтимол ўз кучини йўқотди (агар узайтирилмаган бўлса). Лекин пахта ип калавасининг ҳар бир килограмми учун 0,01 АҚШ доллари миқдоридаги мавжуд экспорт божига қўшимча тўлов ҳалиям ўз кучида. Тўқимачилик маҳсулотлари экспорти бу йил энг катта ўсишни яратаётган экспорт моддаси бўлиб қолмоқда. Бунда ип-калава экспортининг асосий ҳиссаси бор. Ип-калава экспортига нисбатан турли кўринишдаги маъмурий чекловлар ва божлар охир-оқибат қандай оқибатлар яратиши мумкинлиги борасидаги хавотирлар ҳақида мана бу ерда ва мана бу ерда ўқишингиз мумкин.