Текстиль экспортига қўшимча рағбатлар берилмоқда Аввал хабар берилганидек, “Айрим саноат тармоқларида сифатли ва рақобатбардош маҳсулотлар ишлаб чиқаришга қаратилган қўшимча чора-тадбирлар тўғрисида”ги фармон имзоланди. Унда Давлат раҳбарининг бизнес билан очиқ мулоқоти давомида текстилчилар илгари сурган қатор рационал таклифлар ҳам ўрин олган. Хусусан, унда белгиланишича, 2024 йил 31 декабрга қадар ип-калавани экспорт қилишда ундириладиган йиғимнинг амалдаги миқдори 5 бараварга камайтириладиган бўлди. Шунингдек, 2025 йил 1 январга қадар ип-калава ишлаб чиқарувчиларга Экспортни рағбатлантириш агентлиги маблағлари ҳисобидан пахта ва сунъий толани ўз эҳтиёжи учун импорт қилишда (қўшни давлатлардан ташқари) транспорт харажатларининг 50 фоизи қоплаб берилади. Алоҳида айтиш керакки, сўнгги йилларда тўқимачилик ва тикув-трикотаж саноатида барча йўналишлар бўйича ижобий динамика кузатиб келинмоқда. Эндиликда тармоқда маҳсулот ишлаб чиқариш ҳажми ўсишда давом этиши, экспорт миқдори эса кўпайиб бориши учун янги имкониятлар пайдо бўлади. Тадбиркорларимиз жаҳон брендлари билан ишлаши учун органик пахта ишлатишади ва бу, албатта, маҳсулот сифатига ижобий таъсир қилади.