Президентнинг бизнес билан учрашувида янграган таклифлар рўёбга чиқишда давом этади: навбат қандолатчилик ва тўқимачилик йўналишларига Президентнинг тадбиркорлар билан очиқ мулоқотида қандолатчилик ва тўқимачилик йўналишларига оид масалаларда қатор таклифлар илгари сурилган эди. Шунга асосан 21 ноябрь куни Президент фармони қабул қилинди ва ушбу йўналишлардаги муҳим янгиликлар эълон қилинди. Хусусан, фармон билан қандолатчилик корхоналарига экспортолди ва экспорт билан боғлиқ савдо операцияларини молиялаштириш учун охирги 12 ой мобайнида амалга оширилган экспорт ҳажмидан келиб чиққан ҳолда 2 йил муддатгача молиявий ресурслар ажратиладиган бўлди. Бу нима дегани? Эндиликда қандолатчилар экспорт ҳажми қанча юқори бўлса, шунча кўп маблағга эга бўлишади. Шунингдек, фармонда келтирилишича, 2025 йил 1 январгача кенг турдаги қандолат маҳсулотларини ишлаб чиқаришда фойдаланиладиган қадоқлаш ва этикеткалаш маҳсулотлари божхона божидан озод этилади. Бу орқали тадбиркорларнинг маълум харажатлари қисқаради, натижада маҳсулот ишлаб чиқариш ҳажми ошади.