Принуждение к АЭС? Вазиримиз Жўрабек Мирзамаҳмудов АЭС қурилиши ҳақидаги саволга жавоб бера туриб (23:10 дақиқадан), музокаралар давом этаётганини, МАГАТЭ билан жараёнлар кетаётгани, кичик модулли реакторлар варианти ҳам кўрилаётгани, Россиядан бошқа мамлакатларнинг тажрибаси ҳам ўрганилаётгани, 7 марта эмас, 77 марта ўйлаш кераклигини таъкидлаганди. Ҳартугул, бу гаплар эртага мустақиллигимизга реал таҳдид соладиган ва феълан агрессср қўлида атом бомбасига айлантирилиши мумкин бўлган АЭС қурилмаслигига тўлиқ кафолат бермасада, жиловни қўлдан бериб қўймаганимизга ишора бераётгандек эди. Буёқда эса, кечаги чиқишида «Росатом» бош директори Алексей Лихачев Ўзбекистонда атом электр станциясини қуриш юзасидан шартнома бўйича ишлар якуний босқичда, деб жар солмоқда. Украинанинг авария ҳолатидаги Чернобиль АЭСи, кейин Европадаги энг йирик Запорожье АЭСини босиб олиб, станциялардаги активларни ўзининг энергетик балансига ўтказиб олган ва ядровий шантажни кун тартибига айлантирган босқинчи давлатнинг давлат корпорацияси раҳбари очиқдан-очиқ "биз шартнома имзолашдан йироқда эмасмиз" деб турипти. Қизиқ томони газ масаласими, нефтми, лаънати ЕОИИми, рус-тузем мактаб қуриб беришми, нимаики янгилик бўлса, аввал шимол томондан эшитамиз. Гўёки биз эшитувчи ва қабул қилувчи томонмиз. Бизникилар ё мум тишлаб, сукут сақлашади ёки якунда мулозимларимизнинг севимли оғаларининг баёнотлари тўғри бўп чиқади. Бу сафар нима бўлади? "Ишончингизни оқлаймиз"/"Отработаем" қабилидаги жавоб бериладими ёки тинимсиз тиқиштирилаётган, миллат ва мамлакат учун кулфат бўладиган бу лойиҳага нисбатан баралла "йўқ" деймизми?