Кулфатимизга айланажак АЭС ҳақида узунроқ пост Мен рости билмайман, қайси бири миллат ва мамлакатга кўпроқ хавф яратади - ЕОИИга киришми ёки АЭС қурилиши. Аниқроқ жавобим шуки, иккисиям миллат ва мамлакатни миф ва иллюзиялардан иборат қора туйнукка элтади ва бир-бирини тўлдирадиган хатарларни яратади. Биринчи нуқта: АЭС энергетик таназзулни бартараф этади, дея айтилаётган ёлғон. Бу янги даврда айтилаётган энг катта ёлғонлардан бири. Энергетик таназзулни АЭС эмас, Ўзбекистонда энергетика бозорини яратиш ҳал этади. Ўзбекистон постсовет ҳудудида энергетика бозорини ярата олмаган энг қолоқ уч мамлакатдан бири ва ҳали ҳануз тақсимлаш ва ўзлаштиришга асосланган энерготизимдан фойдаланиб келмоқда. Бу йўлда қилиниши лозим бўлган икки вазифа бор: ҳар қандай янги генерацияни солиқ ва бюрократиядан озод қилиш ва мулк ҳуқуқини кафолатлаш. Очиқ бозор ва мулк ҳимояси шароитида инвесторлар пулни АЭСга эмас, яшил технологияларга асосланган генерацияга тикади. Иккинчи нуқта: АЭСнинг заруриятини оқлаш ва қўллаш учун ҳудудларда йиллар давомида электр энергиясига муҳтожликдан азоб чекаётган қатламларнинг нозик ҳиссиётларидан фойдаланилмоқда. Хотини туғруқхонада қоронғуда туғаётган, фарзанди чироқсиз дарс тайёрлай олмаётган, қариялар ибодатини амалга ошира олмаётган ва умуман энг ибтидоий даражага туширилган фуқароларнинг инстинктив фикрларини халқ танлови дея тақдим этишдан заррача уялишаётгани йўқ. Учинчи нуқта: АЭС қурилиши ўта шубҳали шошма-шошарлик билан, ҳеч бир танлов ва конкурссиз тоталитар ўтмиш ва бугунга эга, суверенитетимиз учун доимий хавф бўлган Россия корпорацияси Росатомга топширилди. Мен сизларга узоқ 1949 йилдан буён совет ва рус атом станциялари ва кемаларида содир бўлган юзлаб катастрофалар ва уларнинг тан олинмаган ўн минглаб қурбонлари ҳақида ҳикоя қилиб бермоқчи эмасман. Узоққа бормайман. Ўтган 2019 йилнинг июлида Баренц денгизида рус атом кемасида ёнғин содир бўлди. Ўнлаб қурбонлар, бутун Евроосиё материги бўйича тарқалган ва Ўзбекистонгача етиб келган радиацияга қарамай, Кремль бўлиб ўтган фожеани тан олгани йўқ. Чунки тоталитар жамиятлар учун, Россия эса бугунги дунёдаги энг ярамас тоталитар давлат, инсон ҳаётининг заррача аҳамияти ва қиймати мавжуд эмас. Россия қурадиган АЭС АЭС эмас, том маънода табиатимиз учун, жамиятимиз учун ҳам, давлатчилигимиз учун ҳам атом бомбасидан фарқланмайди. Тўртинчи нуқта: АЭС қурилишини ҳаммадан кўра кўпроқ Экологик партия, собиқ Экоҳаракат маъқуллаётганига эътибор қаратинг. Булар тепадан топшириқ бўлса, ҳар қандай абсурдни оқлашга тайёр ва ҳозир. Эсингиздами, ўтган даврда улардан тожик ва қирғиз ГЭСларини қурилишига қарши қандай фойдаланишгани. Буларга топшириқ бўлса дарахтларнинг инсон соғлиғига зарарини, цемент заводларининг генофондга фойдасиниям дастаклаб беришади. Хуллас, мен Ўзбекистон ҳудудида АЭС қурилишига рози эмасман, ҳеч қачон рози бўлмайман. Кимки Ўзбекистон номидан бу ишни амалга ошираётган бўлса, бу ишда менинг овозим мавжуд эмас, бу ишга ваколатимни бермаганман ва ҳеч қачон бермайман ҳам. @the_bakiroo