​Экилган эмас, кўкарган кўчат сони асосий кўрсаткич бўлиши керак Айтилишича, ҳар йили 200 миллион туп кўчат экилади. Масалан, Андижон вилоятида 15 миллион кўчат экилиши белгиланган. Шу кунлар ва яқин ўтмишимизнинг аччиқ тажрибаси кўрсатадики, экилган эмас, кўкарган кўчат асосий ўлчов бўлиши керак. Ҳокимлар керак бўлса, 15 миллион эмас, 20 миллион кўчат экади. Пул ажратилса бўлди, ҳокимлар ўзлаштириш йўлини топишади. Шу сабабли масъуллардан кўкарган кўчатлар сарҳисобини ва ҳар бир кўкарган кўчат бюджетга, яъни солиқ тўловчиларга қанчадан тушганининг ҳисобини бериш вазифаси юклатилган маъқулроқ назаримда. Яна бир масала эълон қилинган "зарбдор 40 кунлик" билан боғлиқ. Ҳафтанинг охирида ҳарорат шимолда -10 даражагача, бошқа ҳудудларда -5 даражагача пасаяди. Бундай вазиятда кўчат экиб бўладими ўзи? Мутахассислардан сўраб кейин иш тутган маъқул. Чунки ҳокимларга қолса, тепадан топшириқ, режа, зарбдор кунлар дея музлаган ергаям кўчат қадайверади. Суратда шу йил баҳорда экилган арчалар. Тошкент шаҳри Яшнобод тумани.