Орзудаги интеграция Қозоғистон билан интеграциядан жуда кўп ютамиз, улар ҳам ютади. Мана шу мақолада кўрсатилган муаммолар ҳам бунга бир исбот. Бу худди Германия ва Франциянинг "кўмир ва пўлат" иттифоқи сингари синергия беради. Бизга етмаётган молиявий, энергия ресурслари Қозоғистонда ортиқча. Қозоқларга торлик қилаетган катта бозор, ишчи кучи, хом-аше бизда бор. Тил, менталитет, қонунчилик фарқликлари минимумда. Бу интеграциядан аввалига қуйи даромадларга эга мамлакат аҳолиси кўпроқ ютади, яъни ўзбекистонликлар даромадларини кескин оширади. Таргетдаги жон бошига 4000 долларлик ЯИМга етиш амалда реалликка айланади. Кўпчилик эсламаса керак, 1993 йил рубль зонаси парчаланаётган вақтда, ички бозорни ҳимоялаш мақсадида Ўзбекистон ва Қозоғистон ягона валютани муомалага киритишга жуда яқин бўлган. Ҳатто бу ҳақда Каримов Назарбоев билан келишувга эришганини Парламентдаги бир йиғилишда айтган эди. Лекин қатор ташқи сабаблар туфайли бу воқелик амалга ошмай қолган. Йиллар ўтиб тарих яна икки мамлакатга уларнинг биргаликдаги тараққиёти бўйича уникал имкониятлар борлигини эслатмоқда.