Шунчаки солиштириш учун Гидроэнергетикани ривожлантиришни рўкач қилган ҳолда Абдуғани Сангинов раҳбарлиги остидаги “Ўзбекгидроэнерго” АЖдан 1 киловат.соат электрни 675 сўмдан ёки 6,23 центдан сотиб олиш бошланаётгани, бу бюджет ва давлат ресурсларининг ҳеч бир танловсиз ўта қиммат энергияни сотиб олишга йўл очиши масаласи жамоатчилик ва ОАВлар эътиборидан четда қолди. Гарчи қиймати ва кўлами бўйича бу ўтаётган ҳафтанинг энг саволли масаласи эди. Балки кенг жамоатчилик ва ОАВ куппа-кундуз куни халқнинг чўнтагига қўл солинаётганини англаб етмагандир. Эсингизда бўлса, ўтган йили Канаданинг SkyPower Global компанияси билан битим айнан компания таклиф қилган электр ўта қимматлиги, яъни 6 центдан бўлгани учун бекор қилинган эди. Ҳеч ким савол бермаяптики, нега биз Канаданинг SkyPower Global компаниясидан 6 центдан электр олишни бекор қилган бўлсак-да, “Ўзбекгидроэнерго” АЖдан 6,23 центдан электр олишга тайёр бўлмоқдамиз? Келинг, солиштириш учун, Ўзбекистонда бошқа қуёш ва шамол станциялари таклиф этаётган электр нархларини кўрайлик: Қораўзак туманидаги шамол электр станцияси “ACWA Power” - 2,56 цент; Навоий фото электр станцияси "Masdar" - 2,68 цент; Самарқанд ва Жиззах фото электр станциялари "Masdar" - 2,68 цент; Шеробод тумани қуёш фотоэлектр станцияси Abu Dhabi Future Energy Company - 1,80 цент. 2018 йилдан буён амалга ошаётган қуёш ва шамол энергетикаси бўйича танланган лойиҳаларнинг биронтасида 3 центдан қиммат электр йўқ ва SkyPower Global компаниясининг 6 центлик таклифи ҳам аслида мамлакат манфаатларини кўзлаб бекор қилингани тўғри бўлган. Чунки охир-оқибатда асоссиз қиммат электрнинг тўлови халқнинг ва бизнеснинг гарданига тушади.