Саноат ишлаб чиқариш асосан энергоресурслар ҳисобига ўсмоқда 2021 йилда саноат ишлаб чиқариш физик ҳажми 8,7 фоизга ўсган. Энергоресурслар ишлаб чиқариш ўсишнинг асосий омилларидан бўлган. Хусусан, электр генерацияси 4 млрд.квт.соатга ошган ва 70,1 млрд.квт. соатни ташкил этган. Бу Ўзбекистон тарихидаги янги рекорд. Табиий газ ишлаб чиқариш 4,1 млрд.кубга кўпайган ва 53,8 млрд.кубдан иборат бўлган. Гарчи газ қазиб олиш 2021 йилда юқори суръатда ошган бўлса-да, 2019 йил (60,5 млрд.куб) ва ўтган эпоха максимум кўрсаткичларидан (66 млрд.куб) анча ортда қолинмоқда. Шунингдек, нефть ва кўмир қазиб олиш ҳам ортаётганини таъкидлаш лозим. Лекин қатор саноат товарлари бўйича қисқариш давом этмоқда. Саноат ишлаб чиқаришнинг энг катта қисқариши автомобилсозликка тўғри келади. Имтиёзхўр, қолоқ ва нўноқ автомобилсозларимиз енгил автомобиль, юк автомобили, трактор ва двигатель ишлаб чиқаришни кескин қисқартириб юборишган. Саноат ишлаб чиқариш ҳажми қисқариши яна буғдой ва ун, пишлоқ ва творог, ўсимлик ёғи, тамаки, ароқ, вино каби муҳим озиқ-овқатларда ҳам давом этмоқда.