Фикри ожизимча, ҳозирги Савдо-саноат палатасининг ноадекватлиги унинг ўзини "вазирлик" деб билишидан келиб чиқади. Янги замондаги ғалати қоидалардан бири шуки, ҳар бир муаммонинг "эгаси", масала кўтарилганда сўкиладиган вазири бўлиши лозим. Селектор ва мажлисларда бизнес муаммолари ҳақида сўз очилса, ўзи яхшигина дўхтир бўлган палата раиси лик этиб қўл қовуштириб туриши лозим. Ҳар қандай "вазирлик" ва "вазир" эса ваколатларини тинимсиз кенгайтиришни, номенклатура тилида айтганда кучайишини, хоҳлаганча ишлатиладиган, назоратсиз бюджети бўлишини истайди. Палатага аъзолардан агар аъзолик нима берди, деб сўрасангиз, судга ишим тушса даъво учун бож тўланмайди дейди. Шу. Даъво аризасиниям бечора аъзолар флешкага ёзиб палатага келтириб беришади. Ҳозирги палатадан даъво аризалари учун давлат божини тўлашдан озод қилиш бўйича имтиёз олиб ташланса, феълан унга зарурият ҳам қолмайди. Албатта бу дегани Савдо-саноат палатаси керак эмас, дегани эмас. Аъзолик ихтиёрий, ўзаро манфаатли, ҳуқуқий ёрдам, бизнес учун "профсоюз" принциплари асосидаги палата мамлакатга жудаям керак. Бундай орзудаги палата масалан, бизнес эгалари қамоққа тиқилганда, бизнеси тортиб олинганда, мулки бузилганда, бизнес учун зиёнли қонун ва қарорлар қабул қилинганда жим турмайди. Бизнес ҳамжамияти ва ҳокимият ўртасидаги самарали кўприк вазифасини бажаради. Лекин бундай орзудаги палатани биз орзу қилиб ўтиб кетсак керак. @the_bakiroo