Савдо-саноат палатаси "Тадбиркорлар вазирлиги"га айланишда давом этади Бутун дунёда бизнес профсоюзи тарзида иш юритадиган, давлат ва ҳукуматга боғланмаган, ихтиёрийлик, талабгорлик ва ҳисобдорлик асосларида ташкил этиладиган Савдо саноат палатаси Ўзбекистонда тобора вазирлик мақомига яқинлашмоқда. Балки шунинг учун бизнес муаммоси нима, ҳимояси нима, вакиллик нима, қаерда зиён, қаерда фойда аралашиб кетган ва палата дейилса, одатда судга бож тўламай даъво киритадиганлар тушуниладиган даражага етилган. Демак, янги ҳужжатга кўра Савдо-саноат палатасига аъзолик микро, кичик ва ўрта тадбиркорлар учун текин бўлади. Шунингдек, янги бизнес субъектлари рўйхатдан ўтганда, улар ҳақидаги маълумотлар аъзо сифатида рўйхатга қўйиш учун Палатага юборилади. Яъни, аъзолик феълан ихтиёрий-мажбурийлик касб этади. Бу ҳаммаси эмас. Палатага Олий мажлис қошидаги фонд орқали субсидиялар ажратилади (субсидиясиз қандай ишлаш мумкин ахир?). Республиканинг 23та туманида Тадбиркорлар хиёбонлари ташкил этилади. Бу ер, коворкинг ва албатта мулк дегани. Бошқа ҳудудларда ҳам ишлатилмаётган давлат кўчмас мулклари негизида хиёбонлар ташкил этиш кўзланган.