Ягона биллинг орзуси
Блокланган твиттерда Давлетовўз ёзиб қолди:
"Бизда бир вақтлар ягона коммунал тўлов (ягона қозон) жорий қилишмоқчи бўлишган эди а? Шу нима бўлди кейин?"
Янги Ўзбекистонда ҳар йили юзлаб қарор, фармонлар тайёрланади, имзоланади, эълон қилинади. Лекин бу улар ижро қилинади, дегани эмас. Кўпинча ҳатто ташаббускорларнинг ўзининг эсидан ҳам чиқиб қолади.
Масалан, "Коммунал хизматларнинг ягона биллинг тизимини ташкил этиш тўғрисида"ги Қарор чиққанига 5,5 йил бўлди. Унга кўра, 2018 йил 1 августгача Ягона биллинг тизими ишлаб чиқилиши, 2019 йилнинг 1 январгача — электр ва газ таъминоти, 2021 йил 1 январгача — ичимлик сув таъминоти, канализация ва иссиқлик таъминоти унга уланиши лозим бўлган.
Лекин бу қарорнинг биронта банди ишлагани йўқ. Чунки ижрочилар ҳам йўқ, назорат қилувчи ҳам йўқ. Тўғрироғи, улар бор, лекин улар бўзчининг мокисидек лавозимдан лавозимга кўчиб юради. Ўзбек чиновниги бир лавозимда 1 йил ўтирса оқсоқол деган ном олаяпти янги даврда. Ким жавобгар - ҳеч ким билмайди. Ўзбек чиновнигининг бугунги ҳаёт тарзи ва ўлчовлари селектордан селекторгача белгиланади.
Икки йил ўтиб яна битта қарор чиққан. Унга кўра, Тошкент шаҳрида коммунал хизматларнинг алоҳида ягона биллинг тизимини 2019 йил 1 апрелга қадар ташкил этиш бўйича чора-тадбирлар белгилаб қўйилган. Буям бажарилмаган. Бу орада кадастр рақамини истеъмолчи идентификаторлари сифатида белгилашга уринишлар ҳам бўлди.
Ўтган йили ёзда эълон қилинган Фармонга кўра , 2021 йил 1 декабрга қадар коммунал тармоқлардаги барча рақамлар (газ, электр, иссиқ сув, ичимлик суви, канализация, чиқинди) жисмоний шахснинг шахсий идентификация рақамига ва юридик шахсларнинг солиқ тўловчининг идентификация рақамига боғланиши керак эди.
Бу вазифа ҳам бажарилгани йўқ.
Шунинг учун мен ягона биллинг яралиши масаласида кўп нарса кутмайман. Барча белгиларига кўра ўғри, муттаҳам, ўзлаштирувчи ва коррупционерларни коррупционер деб аташга, оддийгина каллакланган декларациялашни жорий қилишга хоҳиш йўқ мамлакатда бу ҳайрон қоларлик нарса эмас, мен учун.
@the_bakiroo