ЕОИИдан чиқиш тўғрисидаги чақириқлар Қозоғистонда тобора баландроқ янграмоқда Қозоқ биродарларимиз етти йил аввал юз берган тарихий хатонинг оқибатларини ҳалигача ҳазм эта олишаётгани йўқ. Охирги вақтгача бу ҳақда гапириш ё ёзишга қаттиқ табу бўлган бўлса, Украинага ҳужумдан кейин Россиянинг иттифоқчиси ўлароқ Қозоғистон ўз бўйнига олаётган улкан зарарлар овоз чиқармасликнинг иложини қолдираётгани йўқ. Иқтисодчи Олмос Чукин Қозоғистон ЕОИИдан чиқиши лозимлиги ва мустақил ташқи иқтисодий фаолиятга қайтиши зарурлиги ҳақида катта мақола эълон қилган. Назарбоев эпохасида бундай мақолалар аввало чоп этилмас эди, мабодо чиқиб қолса ҳам ОАВ ва муаллифни катта муаммолар кутган бўларди. Чукинга кўра, ЕОИИ (Божхона иттифоқи)га кириш билан Қозоғистон мустақил божхона сиёсати юритиш қобилиятини йўқотган. Мамлакат ташқи савдода Россия фойдасига бир тўда преференцияларни берган, лекин эвазига, образли айтганда, "тулкининг турмуғини ҳам олмаган". ЕОИИ кучлилар, яъни Россия фойдасига хизмат қилган ва бугунги кунда Қозоғистоннинг Россия билан ташқи савдода салбий сальдоси 12 млрд.долларга етган. ЕОИИ доирасидаги техник регламентлар жуда мураккаб, сертификатлаштириш жараёни фақат катта давлатга ва йирик бизнесга, демакки, Россияга фойда келтирган. Кўп бора таъкидлаганимиздек, ЕОИИ бу Россия/СССР империясини тирилтириш мақсадидаги ғирт сиёсий лойиҳа ва унга яқинлашиш фақат Кремль учун ишлайдиган сиёсатчилар ва чўнтак бизнесларгагина фойда келтиради, бутун мамлакат иқтисодий колонияга айланади. ЕОИИ бўйунтириғини қабул қилганларни халқ ҳам, тарих ҳам кечирмайди. Ҳеч қачон.