Рубль ва қозоқ тенгесининг сўмга нисбатан қиймати урушдан аввалги ҳолатга деярли қайтди Эртага, 31 мартдан бошлаб амал қиладиган расмий курсга кўра, 1 рубль 136,08 сўмни, 1 тенге эса 24,52 сўмни ташкил этган. Солиштириш учун: Уруш бошланишидан бир кун аввал 23 февраль куни 1 рубль 136,24 сўм, 1 тенге эса 24,82 сўмдан иборат бўлган. Тан олиб айтиш керакки, рус рубли ва қозоқ тенгеси уруш бошланишидан аввалги кунларда ўз қийматини бироз йўқотиб улгурганди. Яна бир тенденция сўмнинг долларга нисбатан жуда тез қайта мустаҳкамланаётгани билан боғлиқ. 17 мартдан кейин ўтган 7 та савдо сессиясида сўм долларга нисбатан қарийб 1,5%га ёки 171,78 сўмга мустаҳкамланишга улгурди. 2017 йил 2 сентябрдан бери эркин валюта ўлароқ муомалада бўлган сўм ҳеч қачон бунча қисқа муддатда бунча сезиларли қийматда мустаҳкамланмаган эди. Байрамдан аввал биржада ҳам, биржадан ташқарида ҳам (хусусан айирбошлаш шохобчаларида) аҳоли ва бизнесда валюта сотиб олишга талаб юқори бўлган бўлса, байрамдан кейинги кунларда акси — валюта сотишга талаб юқори бўлиб қолмоқда. Яъни, секин-аста яна ҳамма сўмга қайтмоқда. Эртага 2022 йилнинг 1- квартали якунланади. Квартал миқёсида олиб қарайдиган бўлсак, сўм долларга нисбатан 5,19%га қийматини йўқотди, рублга нисбатан 7,46%га, қозоқ тенгесига нисбатан эса 1,40%га мустаҳкамланди. Нисбатан олиб қараганда ёмон эмас.