​​Офшор компаниялар хизматидан фойдаланиш бўйича «Пандора архиви»да бош вазир ўринбосари Сардор Умурзаковнинг рафиқаси Нодира Умурзоқова ва қайнотаси Марлен Азизовнинг ҳам номлари борлиги маълум бўлди. Суриштирувчи журналистлар халқаро консорциуми (ICIJ) 3 октябрь куни 14 та офшор рўйхатга олувчиларнинг 11,9 млн атрофидаги (қарийб 3 терабайт) ҳужжатларини ўзида мужассам этган «Pandora Архиви»ни (The Pandora Papers) эълон қилди. Архивда Ўзбекистон билан боғлиқ бўлган 60 дан ортиқ шахсларнинг исми-шарифлари келтирилади. Ижтимоий тармоқларда улар орасида бош вазир ўринбосари, инвестициялар ва ташқи савдо вазири Сардор Умурзаковнинг рафиқаси Нодира Умурзоқова ва қайнотаси Марлен Азизов ҳам борлигига эътибор қаратилди. Шу жумладан, 2020 йил 23 январь ҳолатига кўра уй бекаси ҳисобланган Нодира Марленовна Умурзакова (1974 й.т.) Британиянинг Виржиния оролларида 2014 йил январида рўйхатдан ўтган Aslett Investments Limited компаниясининг бенефициар эгаси сифатида кўрсатилган. Aslett Investments Limited компаниясининг яна бир бенефициар эгаси сифатида Нодиранинг отаси, бош вазир ўринбосарининг қайнотаси Марлен Азизов (1938 й.т.) кўрсатилган. Ўз вақтида Чиноз уй-жой қурилиш комбинати бош директори бўлган Марлен Азизов 2012 йилдан 2016 йилга қадар Британиянинг Виржиния оролларида ташкил этилган Zarubezhvodstroy Limited, Alastor International Limited, Coribridge International Limited, Cannonford International Limited ва Hartswood Estates Limited компанияларининг ҳам бенефициари ҳисобланади. Инвестициялар ва ташқи савдо вазирлигининг билдиришича, Азизов 1990 йилларнинг бошидан буён бизнес билан шуғулланган, Умурзоқова эса ҳеч қачон хорижда ҳеч қандай актив ёки мулкка эгалик қилмаган ёки бенефициар бўлмаган. @burgutuzb