АвтоВАЗ бир рублга сотилади Renault АвтоВАЗдаги 68%лик улушини Россия саноат вазирлиги қошидаги илмий-текшириш институтига 1 рублга сотади. Лекин 5-6 йил давомида французлар ўз улушини қайтиб сотиб олиши мумкин бўлади, яъни битим опцион шартларида тузилмоқда. Renault АвтоВАЗнинг 25%ини 2008 йилда 1 миллиард долларга сотиб олганди. Кейинчалик ўз улушини кенгайтириш учун яна 3 миллиард долларгача инвестиция киритилган. Renault Россияни тарк этиши Украинага босқинчилик юз бергандан кейиноқ муҳокама мавзусига айланганди. Французлар ўз улуши ва лицензияларини сотишни режалаштиришган эди, лекин токсик активга харидор ҳам, мос нарх ҳам топилгани йўқ. АвтоВАЗнинг қолган 32%и Ростех давлат корпорациясига тегишлилиги инобатга олинса, энди АвтоВАЗ худди совет давридагидек яна тўлиқ давлат назоратига қайтади. Буёғига АвтоВАЗ концерни заводларида лицензияси Renault'га тегишли бўлмаган автомашиналаргина ишлаб чиқарилади. Булар: Нива, Гранта ва Веста линиялари.