"Ишонаверинг... Анжанчасига" Вилоят ҳокимиятининг товуқ сиёсатига бўлаётган эътироз ва норозиликларга нисбатан расмий баёнотини ўқиган борки, ўша машҳур қўшиқни эсламаслиги мумкин эмас. Баёнотда ўша эски усул қўлланилган. Муаммоларни хаспўшлаш ва арзимасдек кўрсатиш, натижаларни эса шишириш. Эмишки, ҳокимиятнинг қизилтовуқлари бозордагилардан қимматлигига сабаб: а) паррандаларнинг соғлом эканлигига ва қанча муддат тухум туғишига ҳеч ким кафолат бермайди; б) товуқ нархига озуқаси қўшиб берилмайди; в) товуқларда касалликлар аниқланганида уларни даволаш учун зооветеринар врачлар томонидан пуллик хизмат кўрсатади; г) энг муҳими бозорда аҳолига тарқатиладиган парранда миқдоридаги товуқ бўлмайди. Демак, биринчидан, барча товар ва хизматлар бўйича чакана нархлар улгуржи нархлардан қимматроқ бўлади, акси эмас. Товуқ бозорларидаги нархлар бу чакана нархлар, юзминглаб товуқлар учун ўрнатилган улгуржи нарх эмас. Таъминотчиларнинг улгуржи нархлари бозор нархларидан камида арзон кўпи билан тенг бўлиши мумкин холос. Улгуржи харидларни амалга оширишда шунинг учун ҳам тендер ва танловлар ўтказиладики, токи ҳаридлар чакана нархлардан арзонроқ тушсин. Улгуржи харидлардаги нархлар чакана нархлардан қимматми, демак у ерда ўғирлик ва ўзлаштириш бор, отнинг калласидек откат бор. Таъминотчиларни 3 кунга подвалга тиқиб қўйилса, кимга қанча узатганини бирма-бир айтиб беради. Иккинчидан, ҳар қандай улгуржи буюртма, агар енг остида ва пул ўзлаштириш учун тузилмаган бўлса, кафолатларни ўз ичига олади. Бу умум қабул қилинган стандарт. Маълум муддатгача товуқларнинг ўлиб қолишидан тортиб, эмлаш ва даволашгача. Яъни бу хизматлар ё кафолатлар товуқ нархларини каррасига қиммат белгилашга сабаб бўла олмайди. Қизилтовуқ сиёсатини юритаётган ва товуқлар қимматлигини оқлаётган ҳокимият ҳатто оддий калькуляция келтира олмаган. Чунки калькуляция уларни ёлғончи эканини кўрсатиб қўяди. Учинчидан, бозорда аҳолига тарқатиладиган парранда миқдоридаги товуқ бўлмайди баҳонаси жудаям кулгули, лекин кабинетменлар учун бу нормал ҳолат. Товуқ сотиб олаётганлар учун чакана бозор ҳам бозор, “Пахтаобод парранда” МЧЖ таклифи ҳам бозор, “Хуршит тантанаси” МЧЖ таклифи ҳам бозор, вҳк. Фарқи шуки, бунда танлов товуқ сотиб олувчида ва асосийси эркин бўлади. Қизилтовуқчиларнинг диктовкаси ўтмайди. Шунингдек, қизилтовуқчилар 100 бош парранда кунига ўртача 80 донадан тухум олинаётгани, тухум 1100 сўмдан сотилаётганини иддао қилишган. Э барака топгурлар, 100 та товуқ олган биронта камбағалнинг товуғи ҳали кунига 50 та тухум туққани йўқ, боринглар, ошкора, камерани қўйиб тажриба ўтказинглар. Бунинг устига қизилтовуқнинг тухуми бозорда 1100 сўм эмас, 700 сўм. Ана энди асосий масалага келамиз. Камида 2 баробар қимматига олинган товуқ, 5%гача ўлим даражаси, тухум туғиш коэффициенти 50%дан ошмаётгани ва қизилтовуқлар тухуми арзонлиги, аввалбошдан олинган кредит бўйича мажбуриятларни, ҳатто бу имтиёзлик кредит бўлса ҳам сўндира олмаслик хатарини яратади. Одамлар ношукурчиликдан эмас, алдангани учун дод-вой солаяпти. Чунки уларнинг, камбағал бўлса ҳам калласида ҳисоби, тарозиси ва масъулияти бор.