Сбербанкни SWIFT'дан узишмоқчи, OTP Bank эса Россиядан кетишга тайёр Европа иттифоқининг 6- пакет санкцияларида Сбербанкни SWIFT'дан узиш қарори ўрин олиши мумкин (буни ўзбек банклари ҳам инобатга олишлари зарур). Россиянинг энг йирик банкини тармоқдан узишга шу пайтгача Германия қаршилик қилиб келган, гарчи Польша ва Болтиқбўйи давлатлари бунга ундаб келган бўлса ҳам. Германияда охирги ҳафталарда негиз тутаётган янги ижтимоий фикр немис сиёсатчиларини дадилроқ ҳаракат қилишга ундамоқда. Немислар том маънода Европа уйи хавфсизлиги учун санкцияларнинг акс оқибатларини ўз чўнтакларида ҳис этишга тайёр. Россия банк бозори учун ёмон хабарлар бу билан кифоя қилмайди. Шарқий Европанинг энг йирик банкларидан OTP Bank Россиядаги активларини сотмоқчи, лекин ҳали харидор топилмаган. Айтиш керакки, Россиядаги тармоқ OTP Bankнинг энг даромадли бозорларидан бўлган. Эсингизда бўлса, мазкур банк Ипотека банкни сотиб олмоқчи эди, лекин уруш бошлангач фаол ҳаракатларни кейинга қолдириш ҳақида маълум қилинганди.