Мартда банкларда депозитлар кескин ошган Жуда мураккаб, айни пайтда Наврўзгача ва Наврўздан кейин турлича кечган март ойида жами депозитлар қолдиғи 5,4 трлн.сўмга ёки 3,7%га кўпайган ва 153,8 трлн.сўмга етган. Бунгача кетма-кет 2 ой - январь ва февралда депозитлар қолдиғининг муттасил камайиши кузатилаётган эди. Албатта, март ойида депозитлар қолдиғининг ўсишининг анчагина қисми девальвация ҳисобига тўғри келади (бунинг аксини апрель якунлари бўйича кўрсак керак). Депозитларнинг ўсиши, агар бу жараён муттасил ва узвий давом этса, тижорат банкининг муваффақияти индикаторларидан бири ҳисобланади. Март ойида энг кўп депозит жамғаришга Туронбанк эришган, мазкур банк қарйиб 4 трлн.сўмлик ўсиш қайд этган, депозитларнинг энг кўп йўқотишига эса Алоқабанк рўпара бўлган (-4,1 трлн.сўм). Ҳар икки сумма миқдор жиҳатдан яқинлиги инобатга олинса, Алоқабанкнинг қандайдир ўта йирик мижози Туронбанкка ўтказилган бўлиши мумкин (маъмурий қарор сабаби истисно этилмаган ҳолда). Умуман олганда, март ойида Туронбанкдан кейин энг кўп депозит ўстиришга эришган банклар - Миллий банк (+3,0 трлн.сўм) ва Асакабанк (+1,5 трлн.сўм) - ҳар икки банк ҳам депозитларнинг долларлашуви масаласида энг пешқадамлар ҳисобланади. Хусусий банклар орасида Капиталбанк (+1,7 трлн.сўм), ОФБ (+0,6 трлн.сўм) ва буни алоҳида қайд этиш керак - Анорбанк (+142 млрд.сўм) депозит бозорида жуда фаол ишлаган. P.S. Банк вакилларининг қўшимча қилишича, Алоқабанк ва Туронбанкнинг депозитлар қолдиқлари бўйича кўрсаткичлари ўрни алмашиб қолган кўринади. Тез орада юқоридаги маълумотлар корректировка қилинишини кутиб қоламиз.