Депозитларнинг қисқариши учинчи ой кетма кет давом этмоқда Январда бошланган, февралда кучайган депозитлар қолдиғининг қисқариши мартда ҳам шиддат билан давом этган. Март ойи давомида жами депозитлар қолдиғи 4,6 трлн.сўмга қисқариб, 206,0 трлн.сўмни ташкил этган. Йил бошидан буён ҳисоблаганда банклардан депозитларнинг жами "қочиши" 10,6 трлн.сўмга етган. Эътиборлиси, депозитларнинг қисқариши икки ойдан бери давом этаётган ўта фаол кредитлаш фонида юз бермоқда. Хусусан, энг кўп кредит бераётган давлат банклари Миллий банк (-4,5 трлн.сўм), Саноатқурилишбанк (-1.1 трлн.сўм) ва Асакабанкда (-780 млрд.сўм) энг кўп депозитлар қисқариши кузатилган. Жами 15 та банкда корпоратив депозитларнинг қисқариши ё ўсмагани қайд этилган. Депозитларнинг қисқариши фаол конвертация билан боғлиқми, нақдлаштириш ортгани биланми ёки бизнеснинг эртанги кунга ишончи сўниб бораётгани ва яширин иқтисодиётга ўтаетгани сабаблими, аниқ фикр айтиш қийин. Лекин буларнинг ҳаммаси тўғри деса хато бўлмайди. Дарвоқе, регулятор март ойи якунлари бўйича пул агрегатлари таркибини очиқлагани йўқ. Депозит бозорида аҳвол мураккаб қолаетганига қарамай, Капиталбанк (+498 млрд.сўм), Ипак йўли банки (+343 млрд.сўм) ва можорлар қўлига ўтиши керак бўлган Ипотекабанк (+353 млрд.сўм) депозитларини фаол ўстирган.