Депозитлар қисқариши давом этмоқда, омонат бозорига аралашмай туриш керак Июнь ойи мобайнида жами депозитлар қолдиғи яна 1,9 трлн.сўмга қисқарган. Бунда корпоратив депозитлар 7,7 трлн.сўмга қисқарган бўлса, аҳоли омонатлари 5,8 трлн.сўмга ўсган. Яъни аҳоли омонатларининг ўсишигина вазиятни бирмунча юмшатиб турипти. Бошқача айтганда, банклар охирги ойларда, хусусан июнда ҳам аҳолидан омонат олиб, аҳолига кредит ажратишга ўтган. Корпоратив депозитларнинг йил бошидан буён қисқариши 25 трлн.сўмдан ошган. Июнь ойида барча давлат банкларида, умуман олганда эса 19 та банкда корпоратив депозитлар қолдиғи камайиши қайд этилган. Хусусан, ҳукуматнинг агентлари бўлган Миллий банк (-2,9 трлн.сўм), Асака банк (-1,2 трлн.сўм) ва Ўзсаноатқурилишбанк (-1,1 трлн.сўм) бу борада етакчилик қилишган. Юқорида таъкидланганидек, аҳоли омонатлари вазиятни бироз енгиллаштириб турипти. Омонатларнинг фоизларига оид оғзаки чекловлар бекор бўлгач, Агробанк (+869 млрд.сўм), Ўзмиллийбанк (+585 млрд.сўм) ва Ипотека банк (+553 млрд.сўм) омонат бозорига фаол қайтган. Ҳозирги вазиятда энг асосий иш бозорга аралашишдан тийилиб туришдир. Шундагина унинг иштирокчилари янги шароитларни қабул қилиб, кўникишни бошлашади. Мувозанатга вақт керак.