​Олигархияга ишончли бошқарувга берилган Ангрен ИЭС ва Янги Ангрен ИЭС миллиардлаб зарар келтиришда давом этмоқда Давлат активларини бошқариш агентлиги зарар келтириб ётган давлат корхоналари рўйхатини эълон қилди. Эътиборлиси, энг зараркунанда корхоналар рўйхатида ишончли бошқарувга берилган "Янги Ангрен ИЭС" АЖ ва "Ангрен ИЭС" АЖ ҳам бор. Биринчиси 304 млрд.сўм, иккинчиси 87,6 млрд.сўм зарар келтирган. Ўзбекистоннинг энг йирик иссиқлик электр станциялари бўлган мазкур икки корхона Central Asia Energy МЧЖ корхонасига ишончли бошқарувга топширилган. Мазкур МЧЖга эса Қозоғистонда рўйхатдан ўтган ТОО "Горные работы" эгалик қилиб келади. Ҳар икки контора ишончли бошқарув битими имзоланишидан бир неча ой аввал ташкил этилган. Булар ким бўлиши мумкин дейсизми? Бегона эмас, мақсади Ўзбекистонни талаш ва бебилиска бойлик орттиришдан иборат бўлган олигархия. Зийрак ўқувчи "Янги Ангрен ИЭС" АЖ ва "Ангрен ИЭС" АЖ Кузатув кенгашини эгаллаб олганларнинг рўйхатига кўз ташласа, гап ким ҳақида кетаётганини дарҳол илғаб олади: Шодиев Кабул Каюмович («SFI MANAGEMENT GROUP» МЧЖ ХК) Назаров Нодир Кахарович («CENTRAL ASIA ENERGY» МЧЖ ХК) Упушев Ерлан Елемесович («CENTRAL ASIA ENERGY» МЧЖ ХК) Гаибназаров Дилшод Махкамович («CENTRAL ASIA ENERGY» МЧЖ ХК) Рахматов Алишер Хамзаевич («CENTRAL ASIA ENERGY» МЧЖ ХК). Эсингизда бўлса, бу контора билан афилланган SFI Management Group'га Ўзметкомбинат, ОКМК ва Ўзвторцветмет корхоналаридаги давлат улушларини ишончли бошқариш ҳам топширилган, молиявий аҳвол ва схемалар чидаб бўлмас даражага етгач ишончли бошқарув битимлари бекор қилинган эди. Янги эпохада мамлакатимизга мўр-малахдек ёпирилган очофатларнинг пул ўзлаштириш схемалари жуда оддий: каррасига қимматга хом-ашё (кўмирдан тортиб металломгача) ва ускуналар сотиб олинади. Миллиардлаб, триллионлаб фарқ хориждаги шўъбалар ва транзит фирмаларда қолади. Фарқдаги зарар эса Ўзбекистон зиммасига ўтиради. Машҳур ўғри-муттаҳам, олигарх Березовский таъбири билан айтганда "зарари давлатга, фойдаси чўнтакка қабилида" ишланади. Бу йил ёзда Central Asia Energy МЧЖ билан ишончли бошқарувга топшириш битимининг муддати тугайди (Ўзбеккўмир АЖ ҳам шуларга тортиқ этилган), муддат тугаши билан булар билан асло қайта шартнома қилмаслик керак. Корхоналар тўлиқ ревизия ва аудитдан ўтказилиб, вазиятга қараб Ўзбекистонга етказилган зарар бўйнига илиниши даркор.