Муомаладаги нақд пуллар рекорд даражада кўпайган Апрель ойи давомида муомалага чиқарилган нақд миллий валюта қолдиғи 5,3 трлн.сўмга кўпайган ва 33,1 трлн.сўмга етган. Бунгача нақдликларнинг энг юқори ўсиши пандемия даврида — 2020 йил майида юз берганди (+2,5 трлн.сўм). Ўтган ойда нафақат нақд пул, пул агрегатларининг деярли барча компонентлари сезиларли даражада ўсган. Кенг маънодаги пул массаси 12,5 трлн.сўмга ўсиб 145,2 трлн.сўмга етган бўлса, миллий валютадаги пул массаси 12,9 трлн.сўмга кўпайиб, 101,3 трлн.сўмни ташкил этган. Пул массасининг ўсиши вакиллик ҳисобварақларидаги қолдиқларнинг ўсишига ҳам туртки бўлган. Жами "корсчет" қолдиғи ой давомида 6,3 трлн.сўмга ўсиб, 21,8 трлн.сўмга етган. Аввалроқ регулятор нақд пулга талаб ҳаддан зиёд ошиб кетгани фонида муомалага чиқарилаётган қўшимча нақдликлар ҳақида маълумот берганди.