Режа СССРни тиклаш спецоперацияси бўлгани эҳтимоли юқори Украинага нисбатан амалга оширилаётган босқиннинг тўртинчи ойи кетаётган экан, ортга бир назар ташлаб, бўлиб ўтган воқеликлар, армияларнинг ҳаракати, баёнотлардан келиб чиқиб, айрим тўхтамларга келиш мумкин бўлади. Энг асосий хулоса шуки, ҳеч бир томон узоқ давом этадиган урушга ҳозирлик кўрмаган. Шунинг учун ҳам йўл-йўлакай қарорлар тобора ортиб бормоқда. Ва энг асосийси, бу менинг хусусий фикрим, Россия спецоперация режасини тузган, уруш режасини эмас. Спецоперациядан тугал мақсад, Украинани эгаллаш эмас, СССРни тиклаш бўлган. Яъни, гап Украинага ҳужумни спецоперация деб аташда давом этаётган Путиннинг доимий ёлғончилигида эмас, режаларнинг спецоперация сифатида тузилганида ҳам: Уч кунда Киев, Одесса, Харьков маъмуриятларини эгаллаш; Зеленский ҳукуматини жисмонан йўқ қилиш ёки қочишга мажбур қилиш; Януковични ҳокимиятга келтириш (Януковични Россия тарафи Украинанинг ҳокимиятдан ноқонуний четлатилган қонуний президенти деб ҳисоблаб келади); Беловеж келишувини бекор қилиш ва СССР тикланганини эълон қилиш. Яъни спецоперацияга кўра, бунга жуда кўп белгилар ишора қилади, 17 мартларга СССРга асос солган Уч республика номидан Путин, Лукашенко ва Янукович Беловеж келишувини денонсация қилиши, 1922 йилдаги шартнома бўйича СССР давлатчилиги қайта тикланганини эълон қилиши керак бўлган. Рамзларнинг ўрни Путин учун жуда катта аҳамиятга эга эканини эсдан чиқармаймиз. Бу йил СССР ташкил топганига 100 йил бўлади. 17 мартда СССРни сақлаб қолиш бўйича Референдум ўтказилган, унда хусусан Украина ССР (70,2%), Беларусь ССР (82,7%) ва РСФСР (71,3%) иттифоқни сақлаб қолиш учун овоз берган. Урушнинг илк ҳафталарида Лукашенконинг ҳатто Путиндан ўтказиб урушнинг қўллагани эсингиздами? Иттифоққа, Украинадан кейин бошқа республикалар ҳам барибир киришга мажбур бўлиши тўғрисидаги гаплари-чи? Яъни Лукашенко ўзи билмай ё атайин, спецоперациянинг якуний мақсадларини сиздириб турган. Агар спецоперация муваффақиятли кечганида бу Путин сиёсатининг Квинтэссенцияси бўлган, руслар учун тарихда ҳамма хатолари унутиладиган Сталин-у, Петр биринчилардан ўтадиган қаҳрамон ўлароқ қолган бўларди (яқинда ўзини бекорга Петрга менгзагани йўқ), Лукашенко эса умрининг охиригача кафолатланган ҳокимиятни сақлаб қоларди. Уруш чўзилаётган экан, Путин СССРни тиклаш режасидан воз кечдими деган савол туғилади. Менимча, йўқ. @the_bakiroo