Мен буларни сайламаганман Аввало айтиб қўяйин, мен буларни сайламаганман. Гарчи мандатини оқлаётган учта ва яна яримта депутатни ҳурмат қилсамда, менинг иқтисодий, сиёсий ва ижтимоий қарашларимни ўзини парламент депутати деб атайдиганларнинг биронтаси ифода этмайди. Менинг овозим йўқ бу парламентда. “Ташаббусли бюджет”да овоз беришга бўлаётган эътирозларнинг сабабини шахсан мен ҳеч қачон сайланмаган, рақобатли курашда сайлов компанияси ўтказмаган, очиғини айта қолайин, балки рўйхат бўйича тайинланган "депутат"ларнинг ўлчовларига боғлайман. Том маънода “Ташаббусли бюджет”да қатнашиш жараёнини мураккаблаштиришга уриниш - ҳамиша ҳокимлар ёки юқорининг рўйхати билан тайинланиб келганларнинг сиёсий хоҳиши. Ахир ўйлаб кўринг, жамоатчиликнинг ўзи уюшиб ўғри-муттаҳам ҳокимсиз ҳам йўлни яхшиласа, сув олиб келса, мактабни жиҳозласа ёки кўприкни таъмирласа, ҳокимнинг ўрни қайдалиги, аслида кимлиги билиниб қолмоқдаку. Ит ҳам танимайдиган, ким сайлагани номаълум депутатнинг аслиятинику айтмай қўяқолайлик. Мана масала қаерда. Уларга қолса, “Ташаббусли бюджет” номига ташаббусли бўлиши керак, кимга, қаерга қанча маблағ йўналтиришни ҳокимтўранинг шотирлари ва шериклари белгилаши керак, яъни қайси лойиҳаларнинг ғолиб бўлиши "тайинланиш" орқали юз бериши керак. Худди депутат "сайлов-палови" сингари. Улар нимани исташаётганини мана бу репортажни кўрсангиз, нима демоқчи эканимни яхшироқ тушунасиз. @the_bakiroo