Антимонополиянинг кучи кичик бизнесга етади, аждарҳоларга келганда овози чиқмай қолади Антимонополия қўмитаси автомобилларга газ қуйиш шохобчалари метан гази нархларини сунъий равишда оширган тақдирда уларга қарши чора кўриш билан таҳдид қилмоқда. Агар чакана сотув, яъни газ қуйиш шохобчалари монопол ёки олигопол мавқега эга бўлганида бу баёнотларни қўллаб-қувватлаш ва олқишлаш лозим бўларди. Лекин Ўзбекистонда газ шохобчалари мутлақо бозор шароитида ишлайди. Бозорнинг ягона ёки бир нечта эгаси йўқ. Чакана нархлар талаб ва таклифга қараб эркин шаклланади (дангалига айтганда, газ нархлари ошишини бекор қилиш бўйича ҳукумат қарори 14 июль қоқ яримтунда эмас, сал эртароқ эълон қилинганида шу машмаша - нархлар ошди деган миш-мишлар ҳам бўлмасди). Унда нега антимонополия газ шохобчаларига дағдаға қилаяпти? Чунки қўмитанинг кучи фақат шуларга етади. Ишлаётгани, мавжудлигини қандайдир тарзда оқлаб туришлари керак-ку. Лекин масалан, нархи биржада 17,5 млн сўмга, вилоятларда 18-20 млн.сўмга чиққан дизель бўйича қўмита лом-лим демайди, дея олмайди. Ваҳоланки, айнан дизель ёқилғиси барча занжирларда мутлақо монополлаштирилган ва ҳозир очкўз монополиятлар, уларнинг бири 4 млрд.долларлик Uzbekistan GTL, иккинчиси эса импортни эгаллаб олган яна бир чўнтак молиявий гуруҳ вазиятдан фойдаланиб нархларни оширмоқда. Ўзавтомоторс билан курашиб чангга айланишига сал қолган қўмита Uzbekistan GTL ёки олигархияга қарши курашадими? Йўқ, албатта. Бунинг учун шакар, ун нархлари билан бўлганидек аввал юқоридан "Фас" деган сиёсий топшириқ бўлиши керак. Шундагина қимирлашни бошлашади. Ҳозирча эса бундай топшириқ йўқ.