Антимонополия фақат огоҳлантиради Монополияга қарши курашиш қўмитаси Аи-80 бензиннинг чакана нархлари ўртача 6 800 сўмдан 7 100 сўмгача ошганини қайд этмоқда ва нархларни сунъий равишда ошириш ҳолати аниқланса, субъектларга белгиланган тартибда тегишли чора кўрилиши ҳақида огоҳлантирмоқда. Ҳамма биладики, Антимонополия қўмитаси Ўзавто билан боғлиқ кейсдан кейин бутунлай фалаж қилинган. Қўмита фақат огоҳлантирадиган қўмита. Чора кўрадиган эмас. Ундан ортиғига рухсат йўқ. Мустақил қарор қабул қилишни бошласа, оқибати қандай якунланишини жуда яхши тушунади. Монополистлар, олигархлар тепадаги эшикларни тепиб киришини ҳам. Буни икки йирик нефтни қайта ишлаш заводи ҳам, импортчи очкўз бўрилар ҳам, улгуржи сотувчилар ҳам, чакана сотувчилар ҳам жуда яхши билади. Шунинг учун монополлашган ишлаб чиқариш, монополлашган импортчилар, монополлашган тақсимот ва монополлашган улгуржи савдо вазиятдан исталганча фойдаланаверади. Эслатиб ўтамиз, бутун дунёда нефть нархлари тушиб ётипти, унинг ортидан бензин нархлари ҳам.