Вақтинчалик муаммолар бугундан ечилишни бошласа керак Kommers.uz айрим тижорат банкларида нақд валюта ечиб олишда чекловлар ўрнатилгани ҳақида ёзмоқда. Аввалроқ журналист Азиза Қурбонова тижорат банкларидан бирида нақд доллар ечиш билан боғлиқ муаммога дуч келгани ҳақида ёзган эди. Нақд валюта етишмовчилиги билан ўтган ҳафта охири ва бугун кузатилаётган муаммолар тез орада бартараф этилишини кутиш мумкин. Манбаларга кўра, нақд валютанинг навбатдаги йирик партияси бироз кечикиб бўлсада, етиб келган ва тез орада тижорат банкларига етказилади. Логистика ва тақсимлаш жараёни бироз вақт олиши мумкин. Айрим банклар нақд валюта жалб этиш учун айрибошлаш шохобчаларида нисбатан афзал сотиб олиш курсларини таклиф этишни бошлаган. Айни соатларда 14та тижорат банкида нақд АҚШ долларининг сотиб олиш курси расмий курсдан кўра юқорироқ нисобда ўрнатилган (қоида тарифасида банкларда валюта сотиб олиш курси расмий курсдан кўра пастроқ ўрнатилади).