Йўламатолга суюлтирилган газ етказиб бериш кўзда тутилмаган Юқоридаги қарор билан ўнлаб олис ва бориш қийин бўлган қишлоқ (овул)ларга суюлтирилган газ етказиб бериш ё каррасига қисқартирилган ёки умуман кўзда тутилмаган. Уларнинг қаторида масалан, мен туғилган Йўламатол қишлоғи ҳам бор. Солиштириш учун масалан, ўтган йилги қиш мавсумида қишлоққа 45,3 тонна суюлтирилган газ етказиб берилиши кўзда тутилган эди (амалда қанча етказилгани умуман бошқа масала). Йўламатолга суюлтирилган газ етказиш умуман кўзда тутилмаган бўлса, Марҳаматнинг бошқа чекка қишлоқларига суюлтирилган газ етказиб бериш каррасига камайтирилган. Масалан, сохтакор ўзбек чиновниклари фақат вақти келганда кўз-кўз қилишни хуш кўрадиган халқ шоири Муҳаммад Юсуф туғилган Қовунчи қишлоғига суюлтирилган газ етказиб бериш ҳажми 2,3 баробарига, 85,6 тоннадан 37,4 тоннагача қисқартирилган. Узоқ ва чекка қишлоқларга суюлтирилган газ етказиб бериш қисқариши республиканинг барча ҳудудларга тақсимланган бўлсада, Андижон вилоятида бу айниқса кўзга ташланарли бўлган. Ўтган йил билан солиштирилганда бу миқдор 5 баробардан кўпга қисқарган.