​Марҳамат Йўламатолига суюлтирилган газ Ҳудудгазнинг раиси келса, кейин келадими? Катта қисми газлашмаган, балки шунинг учун шоирлар ва вазирлар чиққан Марҳаматнинг умуман табиий газ етиб бормаган, ўчоқ ва ўтин ишлатиладиган Йўламатолига 113 кундан буён ёки 5 апрелдан бери суюлтирилган газ келтирилгани йўқ. Бундай ҳолат, албатта биринчи марта эмас, ҳар доим шунақа бўлган. Газлашмаган ҳудудларга 30-35 кунда бир газ балллонлари етказиб берилаётгани, автоматлаштирилган “Е-газ” дастури бу шонли энергетикларнинг Ўзбекистон 24 канали учун тўқиган эртаги. Тизим ишлаётган йўқ. Кўпчилик учун газчиларнинг қўл бошқаруви ва микроменежментидан белгиланган вақтида газ ундиришда танишбай воситасидан фойдаланишдан бошқа илож қолмаган. Мен содда ўйлагандимки, суюлтирилган газ нархлари кескин ошгандан кейин, ўпқон тизимда ўғирлик камаяди, тартиб бўлади, суюлтирилган газ етказиш бемалол бўлиб қолади деб. Йўқ, нархлар ошгач, яхшиланиш ўрнига. аҳвол бадтар оғирлашган. Газчиларнинг тарқатган пиар хабарларига кўра, Ҳудудгазнинг янги раиси ўтган ҳафта суюлтирилган газ етиб бормаётган Андижонда, Асакада бўлган. Раис жаноблари яна 20 км юрса, аҳвол унданам оғир, ўзбек чиновниклари эсдан чиқарган чегарадаги Марҳаматга ҳам кириб кетган бўларди. Балки "газчиларнинг каттаси ташрифи" баҳонасида марҳаматликлар, йўламатолликлар ҳеч қурча 4 ойда бир марта газ баллонларини газга тўлдириб олишарди. Чунки бошқа чора-ю, илож қолмаган, мўъжиза рўй бермайди, қонунлар ишламайди, умидлар сўнган. Сиз нима деб ўйлайсиз, Марҳаматнинг Йўламатолига Ҳудудгазнинг раиси келармикан? Суюлтирилган газ-чи?