Михаил Саакашвили: россияликларнинг Грузияга оммавий ёпирилиши демографик хавфлар яратади Қамоқда қолаётган Михаил Саакашвили мобилизациядан қочаётган россияликлар ҳақида ўз фикрларини маълум қилган. Сиёсатчига кўра, россиялик чақирилувчиларнинг Грузияга оммавий ёпирилиши кичик давлат учун демографик хавфлар ва хавфсизлик билан боғлиқ жиддий муаммолар яратади. Айни пайтда Саакашвили қочоқларни мамлакатга киргизиш бўйича ҳукумат қарорини қораламаслигини, қанча кўп чақирилувчилар Грузияга келса, шунча камроқ украиналиклар ўлдирилишини қайд этган. Шунингдек, у жамоатчиликни доимий хушёрликда бўлишга, қочоқлар грузин паспортини сотиб олиши ва мамлакат ички ишларига аралашиш имкониятларини йўққа чиқаришга, қочоқларни Туркия ва бошқа мамлакатларга чиқиб кетишига стимуллар яратишга чақирган .