Шайтонлашаяптими, демак, тўғри йўлдамиз Россиянинг ахборот қуроли фақат мутлақ монополия шароитидагина ишлайди. Ҳар қандай альтернатива олдида Кремль пропагандаси ютқазаверади. Яъни рус тв пропагандасини тўхтатиш учун рус каналларини ўчириш шарт эмас, ёнига бошқа танловларни қолдирсангиз кифоя. BBC World News, CNN International, Bloomberg, CGTN ва TRT Avaz каби хорижий каналларнинг кабель пакетига қўшилиши ортидан рус пропагандаси билан шуғулланувчи телеграм-канал ва сайтлар Ўзбекистон расмийларидан Комил Алламжонов, бизнесмен Зафар Ҳошимов ва жамоатчилик вакиллари Камолиддин Раббимов, Никита Макаренко кабиларни Россияга қарши ахборот кампаниясида айблаб мақолалар жойлаштира бошлагани бежиз эмас. Халққа танлов берилишининг ўзи бугунги Россияда Россияга қарши кампания ўлароқ кўрилади. Кремль ювиндихўрларининг вос-восларига, шайтонлашишларига эътибор қаратиш керак эмас. Қайтанга бу тўғри йўлда эканимизни кўрсатади. Хатоимиз шуки, бу ишни бугун эмас, анча аввал қилишимиз керак эди. Навбатдаги вазифамиз янгиликлар ва сиёсат ҳақида рус тилида эфирга чиқадиган Ўзбекистон тв каналини ташкил этиш бўлиши керак.