Инфляция яна озиқ-овқатлар нархи ҳисобига тезлаша бошлаган Ноябрь якунларига кўра, ойлик инфляция 1,3%ни, йиллик инфляция эса 12,3%ни ташкил этган. Июлдан кейин бошланган ойлик инфляциянинг ўсиш тренди давом этмоқда. Бу сафар нархлар ўсишининг тезлашганига кўпроқ озиқ-овқат инфляцияси вазн қўшган. Ноябрда озиқ-овқатлар нархи 2,0%га, ноозиқ-овқатлар 0,9%га, хизматлар эса 0,8%га ошган. Ноябрда муҳим озиқлар орасида пиёз 11,1%га, тухум 7,0%га, сабзи 5,8%га, сариёғ 2,4%га, сут 2,1%га қимматлаган. Ижара нархларининг ўсиши деярли тўхтаган (+2,6%). Статистика қўмитаси солиштириш учун деярли барча собиқ совет ўлкаларидаги инфляция кўрсаткичларини тақдим этган. Молдовада 34,6%, Украинада 26,6%, Литвада 23,6%, Эстонияда 22,5%, Латвияда 21,8%лик инфляция қайд этилган. Саналган мамлакатлар уруш оқибатларини энг кўп ўз иқтисодий танасида ҳис этишмоқда. Бу уруш инфляцияси, бу Путин инфляцияси.