Инфляция йил охиригача прогноз коридоригача пасаядими? Октябрь ойи 1,3%лик инфляция билан якунланган, йиллик инфляция эса 10,6%ни ташкил этган. Озиқ-овқатлар инфляцияси (1,9%) хавотирли даражада ўсган, охирги марта бундай ўсиш баҳор ойларида кузатилганди. Унинг таркибида пиёз (16,5%га), картошка (14,9%га), тухум (11,2%га), сут ва сут маҳсулотлари (3,0%га), шакар (2,2%га ) ва ун (1,9%га) юқорироқ ўсган. Гўшт нархи ўсиши бироз секинлашган (1,8%дан 1,6%гача). Айрим озиқ-овқатларга нисбатан ҚҚСнинг бекор қилиниши, кутилганидек, нархларда деярли акс этмаган. Ноозиқ-овқат инфляцияси ҳам юқорида даражада бўлган (1,1%). 2019 йил августдан буён ноозиқ-овқат маҳсулотлари бундай юқори суръатда ошмаган. Бензиннинг ўзи октябрда 13,5%га кўтарилган. Кейинги ойлардан юқори бензин нархи барча товар ва хизматларда акс эта бошлайди. Хизматлар бўйича нарх ўсиши эса секинлашган (0,5%). Албатта йиллик прогноз кўрсаткич - инфляцияни 10%дан камайтириш жуда қийин бўлади. Тўғри, ўтган йилнинг ноябрь ва декабрь ойларида базис инфляцияси жуда юқори - 1,7%дан бўлган. Лекин бу етарли бўлмаслиги мумкин. Чунки посткоронакризис шароитида, Ўзбекистон мисолида эса деярли ҳар доим инфляциянинг асосий омили номонетар факторлар бўлиб келган.