Инфляция ноябрда мўъжизавий тарзда 1,2%ни ташкил этди Ноябрь ойининг расмий инфляцияси 1,2% деб эълон қилинди. Бундан юқорироқ рақам қайд этилса, декабрда вазиятни ўнглаш учун қийинроқ бўлиши ҳақида кеча ёзган эдик. Йиллик инфляция эса 10,3% дея қайд этилган. Демак, интригага ўрин қолдирилмади. Йил якунига кўра, мақсадли ориентир - 10%дан паст инфляция кўрсаткичига чиқиш учун декабрь инфляциясини ҳам расман 1,3%гача, деб эълон қилиш кифоя бўлади. Расмийлар ноябрда 1,9%лик озиқ-овқат инфляцияси, 0,8%лик ноозиқ-овқат инфляцияси ва 0,5%лик хизматлар инфляциясини кўра олганлар. Ундан ортиғини эмас. Хусусан, ой давомида бутун жамоатчилик ғазабида бўлган бензин нархлари 9,8%га қимматлашгани билдирилган. Озиқ-овқатлар рўйхатида картошка (10,0%), пиёз (7,5%), тухум (5,4%), сут (4,1%), шакар (4,1%), ун (1,6%) қимматлагани эълон қилинган. Қўй ва мол гўшти ўзбек статистлари назарида ноябрда арзонлаган. Истеъмол нархлари индексида ноябрь учун қабул қилинган вазнлар ҳали эълон қилингани йўқ. Ноябрдаги инфляция мўъжизасини ўрганиш учун ноябрь ойи учун ишлатилган вазнларни қайта кўриб чиқишга тўғри келади.