Ислом Каримов қувонган бўларди: Расмий инфляция ўтган замоннинг "ижод" наъмуналарини ҳам янгилай бошлади Ноябрь ойи якунларига кўра, йиллик инфляция 8,76%ни ташкил этган. Ўзбекистонликларга бунданам чиройлироқ расмий статистика фақат ўтган замонда намойиш этиб келинган. Лекин бу сафар статистика рақамлари "ижод эди" деб аталган давр кўрсаткичларини ҳам янгилай бошлади. Масалан, 2016 йил январда Ислом Каримовга 8,9%лик йиллик инфляция кўрсатилган. Нафақат йиллик, ойлик инфляция ҳам кўзни қувонтирувчи ва эсда қоладиган кўринишга келиб, 1,1%ни ташкил этган. Бу ҳам 7 йиллик минимум. Статистикачиларимизга ишонилса, ноябрда озиқ-овқатлар 1,3%га, ноозиқ-овқатлар 0,7%га, хизматлар 1,5%га қимматлаган. Гўшт 0,2%га, ёғ 0,5%га, гуруч 0,6%га, ун 0,8%га, картошка 3,0%га, пиёз 7,1%га, сабзи 25,7%га арзонлаб кетган. Бутун ой давомида монополистларимиз ўрис оғалари билан келишиб олган ҳолда юқори октанли бензин нархларини деярли 50%га, 1,5 долларгача кўтарганига қарамай, статистика атига 5,0%лик нарх ўсишини қайд этган. Сув учун тарифлар (1, 2) каррасига оширилаётшганига қарамай (бу тўғри сиёсат), тегишли гуруҳда 7,8%лик нарх ошиши ҳисобга қўшилган. Йўловчи поездларида нархларнинг тариф қисми 30−35 фоизга, «Афросиёб» электропоездлариники эса 60 фоизга оширилганига қарамай, статистика темир йўл транспортида йўловчи ташиш 27,9%га қимматлаганини кўрсатган. Хуллас, Ислом Каримов бундай чиройли ҳисобот учун хурсанд бўлган бўларди. Сиз-чи? Хурсандмисиз? Ё қойилмисиз?