Кеча оқшом Озодликда эълон қилинган суриштирув бўйича айрим шахсий мулоҳазаларни, ҳеч бўлмаса, тарих учун қайд этиб қўйиш керак деб ҳисоблайман. Биринчи айтмоқчи бўлганим шуки, очиқланган маълумотлар зийрак ва темада бўлган ўзбекистонлик ўқувчилар учун деярли янгилик эмас. Номи тилган олинган компаниялар, уларнинг бизнеси ва бизнес схемалари бўйича газета ҳам, кун хам, иқтисодчи-ю, жамоатчилик фаоллари, блогерлар ҳам кўплаб чиқишлар, саволлар ва суриштирувларни амалга оширишган. Озодликнинг қолганлардан фарқли қилган иши шуки, бу саволлар ва ҳужжатлар бир материалда жамланган. Иккинчидан, суриштирувдаги саволларга энг аввало номи келтирилган компаниялар ва уларнинг бенефициарлари жавоб бериши керак. Бу ғирт иқтисодий масала. Ҳа, ёпиқ, ҳа, парда ортида, ҳа, рақобатли бўлмаган. Лекин бу иқтисодий масала. Бизнес репутация, тижорий имидж учун, агар бор бўлса, улар ўз позицияларини ойдинлаштиришлари керак. Нимадир ўринсиз деб ҳисоблашса, ана судга беришсин. Учинчидан, мен бошни қумга тиқволиш ечим эмас, деб ҳисоблайман. Биз ўзимизнинг муаммоларни энг аввало ўзимиз муҳокама этишимиз керак, деган позицияда қатъийман. Ўзбек жамиятидаги муаммолар ўзбек ОАВи, ўзбек жамоатчилиги ва ўзбек ҳукуматининг бош оғриғи. Буни бизга ҳеч ким ташқаридан тўғри кўрсата олмайди ва тўғри ечим бермайди. Яшириб озодликни эшитиш ва шивирлаш даврига қайтиш бўлмаслиги зарур.