​Давлат банклари нолинчи йилларнинг зарарли практикасига қайтарилмоқда 90-йилларнинг охири ва бутун нолинчи йиллар давомида давлат банклари банк қонунчилиги ва умум эътироф этилган стандартларни исталганча бузиши мумкин бўлган. Бунинг учун ҳукумат қарори ва ҳаттоки қанақадир протоколи ҳам етарли ҳисобланган. Натижада ўнинчи йилларга келиб ўзбек банклари глобал банк тенденцияларидан бутунлай узилиб қолди, давлат агенти сифатидаги функциялар уларнинг деградациясини чуқурлаштирди, минглаб, ўнминглаб зарарли ва муаммоли лойиҳаларни болалатди. 2017 йилдан кейинги соғлом ҳаракатлар ва қадамларгина ўзбек банкларини бозорга, рақобатга ва глобал стандартларга қайтара бошлаганди. Афсуски, ўтган йили бошланган ва бу йил фаол давом этаётган жараён давлат банкларини ўша ёмон замондагиларнинг практикаларига қайтармоқда. Нафақат қайтармоқда, балки ҳатто улардан ошиб ҳам тушмоқда. Суратда кўраётганингиз қарорнинг банди риск нормативларини очиқча бузишга рухсат беришдан ташқари, кредитлашнинг энг асосий босқичи бўлган техник-иқтисодий асослашдан келиб чиқиб таҳлил ва ўрганишларни ҳам бир четга суриб қўйишга изн беради. Мен билмайман, Марказий банкда кимдир бунга ўзининг визасини қўйиб розилик берганми? Ва рухсат берган бўлса, қайси асосларга таянилган?