Кризисли январда корпоратив кредитлаш тўхтаб қолган Энергетик кризиснинг туби кузатилган январь ойи давомида банкларнинг кредит портфели 1 трлн.сўмдан сал кўпроқ ўсган ва 391,1 трлн.сўмни ташкил этган. Бунда корпоратив кредитлар қолдиғи 225 млрд.сўмга қисқаргани эътиборлидир (солиштириш учун декабрда 4,7 трлн.сўмга кўпайган). Яъни совуқдан қақшаган бизнеснинг январь ойи давомида кредитланишга иштиёқи ва имконияти бўлмаган. Кредит бозоридаги вазиятни чакана кредитлаш бироз юмшатган. Ой давомида чакана кредитлар қолдиғи 1,3 трлн.сўмга ўсган (декабрда 3,3 трлн.сўмга ўсиш қайд этилганди). Хусусан, январь ойи давомида ипотека қолдиғи 362 млрд.сўмга (декабрда 1,3 трлн.сўм) кўпайган холос. Кредит портфелининг энг катта қисқариши Миллий банк (- 2 трлн) , Тенгебанк (-186 млрд.сўм) ва Ипотекабанк (-142 млрд.сўм) ҳисобига тўғри келади. Муаммоли кредитлар (NPL) суммада ҳам, улушда ҳам ўсишни бошлаган. 1 февраль ҳолатига муаммоли кредитлар қолдиғи 14,9 трлн.сўм (+920 млрд.сўм), NPL улуши 3,8% (+0,2%)га етган. Совуқдан зиён еган бизнес сегментларига тақдим этилаётган реструктуризация ҳисобига кейинги ҳисобот саналарида муаммоли кредитларнинг ҳажми ва улуши балансда камайиб бориши мумкин. Лекин ёдда тутиш керакки, бу иқтисодиётдаги реал аҳволни яхшилаб қолганидан далолат бермайди.