Яшил макон: аввалги йиллар учун қарзлар тўланганми? Янги мавсумда нима бўлади? Ҳудудларда Яшил макон дастурининг баҳорги мавсуми бошланиб кетди. Эзгу ниятлар билан йўлга қўйилган дастурнинг асосий муаммолари ўша-ўша, ўзгармаган: Ўзбекистон иқлимига мос бўлмаган, қиммат кўчатлар танланаетгани (қанча қиммат бўлса шунча кўп пул ўзлаштирилади ва ёнга ҳам шунча кўп қолади), суғорилиши ва кўкариши имконияти йўқлигини билиб туриб ерга кўчат қадаш (қанча кўп қуриса, келаси мавсум яна шунча кўп кўчат экилади). Яна бир муаммо борки бу ҳақда очиқ-ойдин айтишга катта ҳадик бор.. Бу кўчатлар учун фермерлар, боғдорчилик хўжаликлари ва умуман тадбиркорларга пул тўланмаслиги билан боғлиқ. Улар ўз пулларини бир мавсум (куздан баҳоргача), ҳатто икки мавсум (баҳордан баҳоргача) кутишади. Ҳокимдан ҳақимни бер деб талаб қила олмайди. Чунки талаб қилса, шундан ҳам қуруқ қолади. Судья ҳам ҳоким, прокурор ҳам ҳоким, охирги пайтда ОАВ ҳам ҳоким бўлиб қолди. Шунақа реаллик юзага келганки, ҳокимларга тегишли конторалар кўчат ва буталар учун ҳақини олдиндан олади, бегоналар эса олдиндан қуруқ ваъда ва кейин фақат саргардонлик. Бу йил тадбиркорлар ваъдаларга учмасликлари лозим. Чунки бюджет, айниқса маҳаллий бюджет имкониятлари анча чекланган. Ортиқча даромадлар бўлмайди ҳисоб. Бўлса ҳам ҳаммага етмайди. Шундай экан, машҳур "Ўн икки стул"да айтилганидек, "эрталаб пул — кечқурун кўчат, кечқурун пул — эрталаб кўчат" қоидасига ўтишга тўғри келади.