"Яшил Макон"ни одамларга бериш керак! Ҳақиқий Яшил Макон шундай бўлиши керак. Ўзи қудуқ қазиб ўзи сув чиқарган, ўзи кўчат эккан, ўзи ободонлаштирган. Кўриб турган жойингиз аввал ахлатхона эди. Ҳар йили Яшил Макон дастурига турли молиялаш манбаларидан 5 трлн.сўмгача пул сарфланмоқда. Экилмаган миллионлаб кўчат экилди дея, экилган миллионлаб кўчатни эса қуритиш билан машғул бўлинмоқда. Аслида эзгу мақсадли ташаббус арчабозлик, чўп суқиш кампаниясига, кўзбўямачилик саноатига айлантирилди. Иқтисодий вазият тобора мураккаблашмоқда, бундан буёғига давлат ва бюджет пулларини совуришга жим қараб туриб бўлмайди. Шунинг учун Яшил Маконни чиновниклардан олиб, одамларнинг ўзларига бериш керак. Масалан, Яшил Макон учун мўлжалланган маблағларни Ташаббусли бюджетлаштиришга қўшиб бериш билан. Одамлар ўзлари қаерга кўчат экишни, қаердан сув чиқаришни жуда яхши билишади. Ўзлари авайлашиб кўкартиришади. Ўзлари бузғунчи дарахт кесувчилардан ҳимоялашади. Ва бу бизга каррасига арзон тушади.