​Солиқ развёрсткаси Март ойининг охирги иш ҳафтасини хусусий бизнес, айниқса унинг кичик ва ўрта сектори совуқ душ қабул қилишдан бошлади. Эрталабдан иловасини очган ёки банкдан кўчирма олган тадбиркорлар ҳисобварақлардан солиққа аванс тарзида тийинигача ечиб олинган ёки талабномалар киритилган ва ҳисоблар картотекага ўтказиб қўйилган ёқимсиз ҳолатга рўпара бўлдилар. Кимдир ҳамкорларига шартномада келишилган пулни тўламади, кимдир энди ходимларига ойликни насия қилади. Кимдир бугун ҳисобига тушиши керак бўлган маблағни ўтказмай туришни, кимдир эса нақд ҳисоб китоб қилишни ўйлай бошлади. Ахир экономика шундай ишлайди. Солиқ разверсткаси, худди большевикларнинг озиқ-овқат разверсткаси каби, фақат бир марта ютади, ундан кейинги циклларда бизнес худди деҳқонлар қизил террористлардан буғдойини яшира бошлагани сингари ёки буғдой экмай қўя қолгани каби иш тутади. Солиқни боқайми ё ўзимга ишлайинми дейди у. Солиқ энди ҳимояловчи полициячи эмас, кўча муюлишидаги қароқчи ўғри сингари гавдаланишни бошлайди. Биз бу хаскашни бошимизга аввал емаганмидик? Егандик. Яна еяпмиз. Нега? Тўғриси, билмайман. Лекин бунга нима туртки бўлгани биламан. Бюджетда пул топувчини ҳам, пул сарфловчини ҳам бир қўлли қилингани. У қўл эртани эмас, бугунни ўйлашга мажбур. Экономика ўсишдан тўхтаган, лекин харажатлардан ҳеч ким воз кечгани йўқ. Қарор қабул қилиш горизонти эса 24 соат. Қанақа мавсумийлик, қанақа молия йили, қанақа иқтисодий цикл ҳақида гапириш мумкин? Энди нима бўлади? Билмайман. Тийиб турувчи, бузғунчи ҳаракатларни ортга қайтарувчи куч ёки истакни ҳозирча кўраётганим йўқ. Шундай экан, нима қилишни, тадбиркор бўлсангиз, ўзингиз яхши биласиз. Айниқса бир йилда тўланадиган солиқ суммаси март ойидаёқ ҳисобингиздан суғуриб олинган бўлса.