​“Ipoteka-bank” ростанам сотилдими ё сотилгани яна бир марта эълон қилиндими? “Ipoteka-bank”нинг 324 миллион долларга сотилгани ҳақидаги хабар бўйича қатор саволларга аниқликлар киритилиши керак бўлади. Биринчидан, битим биржа орқали ўтмаган, биржадан ташқари амалга оширилган. Шунинг учун тўлов юз берганми ё бермаганми, юз берган бўлса маблағлар кимнинг ҳисобига келиб тушган? Молия вазирлиги (ғазначилик)? Давактив? Ё Стратегик ислоҳотлар агентлиги ҳисобига? Иккинчидан, Олди-сотди шартномаси имзоланган куни қуйидагича расмий баёнот берилган: "OTP Bank Ўзбекистон Республикаси Молия вазирлигига тегишли 100% акцияларни (акцияларнинг умумий пакетининг қарийб 97%) икки босқичда сотиб олади: акцияларнинг 75% ҳозир, қолган 25% эса биринчи битим молиявий ёпилганидан уч йил кейин. Биринчи битимнинг молиявий ёпилиши 2023-йилнинг биринчи ярмида амалга оширилиши кутилмоқда". Шундан келиб чиқилса, 324 миллион доллар 75% учун дастлабки тўловми ёки жами 100% учун? Учинчидан, бугунги кун ҳолатига ҳам “Ipoteka-bank”нинг 96,9%лик улуши эгаси сифатида расман Молия вазирлиги қолмоқда. Банк бир неча бор, қайта-қайта такрорланганидек сотилган бўлса, маблағлар амалда келиб тушган ва битим рўйхатдан ўтгани рост бўлса, нега банкнинг асосий пакети эгаси ўлароқ ҳалигача Молия вазирлиги кўрсатиб турилипти?